འཕགས་པ་རིམས་ནད་རབ་ཏུ་ཞི་བར་བྱེད་པའི་གཟུངས་བཞུགས་སོ།

རྒྱ་གར་སྐད་དུ། ཨཱརྻ་ཛྭ་ར་པྲ་ཤ་མ་ནི་ནཱ་མ་དྷཱ་ར་ཎི། བོད་སྐད་དུ། འཕགས་པ་རིམས་ནད་རབ་ཏུ་ཞི་བར་བྱེད་པ་ཞེས་བྱ་བའི་གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་དག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་དུར་ཁྲོད་ཆེན་པོ་བསིལ་བའི་ཚལ་ན་བཞུགས་སོ། །དེ་ནས་དགེ་སློང་ཞིག་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་དགེ་སློང་དེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་འདི་ན་སེམས་ཅན་རྣམས་རིམས་ནད་ཀྱིས་གཙེས་པར་མཆིས་ན། བཅོམ་ལྡན་འདས་དེ་དག་བསྲུང་དུ་གསོལ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཕྱོགས་འདི་ན་མེ་ལྕེའི་འཕྲེང་བ་ཞེས་བྱ་བའི་རིམས་ནད་འདུག་སྟེ། སེམས་ཅན་རྣམས་ལ་ཉིན་གཅིག་པ་དང་། ཉིན་གཉིས་པ་དང་། ཉིན་གསུམ་པ་དང་། ཉིན་བཞི་པ་ལ་སོགས་པ་ལ་ཐུགས་རྗེ་དང་ལྡན་པས་བརྩེ་བར་བྱེད་པས་དེ་སྲུང་བའི་གསང་སྔགས་ཀྱི་གཞི་རྣམས་འདི་དག་ཡིན་ནོ། །ཏདྱ་ཐཱ། ཛྭ་ལ་ནི་ཛྭ་ལ་ནི། པྲ་ཏི་བ་ནི་པྲ་ཤ་མ་ནི་བདག་གི་རིམས་ནད་སོང་ཞིག །མ་འདུག་ཅིག་སྭཱ་ཧཱ། བདེན་པ་དང་། བདེན་པའི་ཚིག་དང་། འཇིག་རྟེན་ན་སངས་རྒྱས་དང་། ཆོས་དང་། དགེ་འདུན་གྱི་བདེན་པ་དང་བདེན་པའི་ཚིག་གིས་བདག་གི་རིམས་ནད་སོང་ཞིག །མ་འདུག་ཅིག་སྭཱ་ཧཱ། སིད་དྷཾ་ཏུ་མནྟྲ་པ་ཏཱ་བ་དྷ་བི་དྱ་ན་པྲ་མ་ཨ་ནུ་མོ་དོ་སྭཱ་ཧཱ། སྐུད་པ་ནག་པོ་ལ་ལན་ཉི་ཤུ་རྩ་གཅིག་བཟླས་ཤིང་མདུད་པ་ཉི་ཤུ་རྩ་གཅིག་བོར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་བསྩལ་ནས། དགེ་སློང་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་རིམས་ནད་རབ་ཏུ་ཞི་བར་བྱེད་པའི་གཟུངས་རྫོགས་སོ།། །